Kruger Wildtuin Uitreik - Junie 2003

Vanaf 4 - 13 Junie het ons ‘n baie suksesvolle JESUS-Film uitreik en opleiding in die Nasionale Kruger Wildtuin aangebied.

Ons het in drie verskillende kampe gewerk, en ook een dag oor die draad na Mosambiek geklim, om daar die film te gaan vertoon. (Sien meegaande foto's.)
Ds. Carel Lourens van Skukuza is ons baie goedgesind en het ons uitgenooi om elkeen van die kampe in die Wildtuin in die volgende jaar of wat te help bereik met die Goeie Nuus van Jesus Christus.
Soos gebruiklik het ons by elke gebied die film vir drie aande op dieselfde area vertoon. Dit is wonderlik om te sien hoe die mense se gesindhede gedurende die drie geleenthede verander:

• Gedurende die eerste aand se vertoning konsentreer ons op evangelisering. Die meeste mense is aanvanklik verskriklik skepties, maar reageer tog om Christus in hul lewens te nooi.
• Die tweede aand, wanneer dit kom by ‘Sekerheid van Saligheid’, begin die mense meer ope te raak, wanneer hulle besef dat Christus regtig nou in hul lewens is, dat hul sondes vergewe is, en dat hulle die Ewige Lewe het.
• Die derde aand wanneer ons hulle die 'geheim van die Christelike lewe' leer, deur op ‘n praktiese wyse vir hulle te leer hoe om hul sondes te bely, wil die mense gladnie daarna huistoe gaan nie. Daar word gesels, gehuil en telefoon nommers uitgeruil.

Die aande na afloop van die byeenkomste moes ons deur die wildtuin terugry na ons kampeerplekke. Die hiënas en ander diere was elke aand langs die pad, en ons moes net mooi ry om hulle nie te pla nie.

Sien ander foto's. (Dit mag dalk 'n rukkie neem vir al die foto's om te laai.)

Back to Vision Trips.

---

Back to top.
Contact Pieter: pbrits at email-sa dot co dot za or 082 469 6724